利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

3:1 「伊的禮物若是謝恩的祭,或是對牛群中獻,無論是公的、是母的,著用無瑕疵的獻佇耶和華的面前。
3:2 伊著按手佇禮物的頭殼頂,刣伊佇會幕的門口。亞倫子孫做祭司者,著用血灑佇壇的周圍。
3:3 對謝恩祭的中間,著將火祭獻互耶和華,用蓋(khàm)臟腑(chōng-hú)的油及臟腑所有的油,
3:4 以及二粒腰子(io-chí)及所有的油,就是倚近腰雙旁的油,及肝裡的網紗(bāng-se)及腰子,一概提起來。
3:5 亞倫的子孫著燒伊佇壇裡燒祭的頂面,就是佇火裡的柴,是獻互耶和華做芳芳的火祭。
3:6 「伊的禮物做謝恩的祭獻互耶和華的,若是對羊群中,或是公的或是母的,著用無瑕疵的。
3:7 若獻一隻羊仔子做禮物,著佇耶和華的面前獻,
3:8 也著按手佇伊的禮物的頭殼頂,刣伊佇會幕前。亞倫的子孫著將伊的血灑佇壇的周圍。
3:9 對謝恩祭的中間,著將火祭獻互耶和華,彼中間的油及伊全牲肢肥( ka-nn̂g-ki pûi )的羊尾對倚近脊骨的所在提起來,以及蓋臟腑的油及臟腑所有的油,
3:10 以及二粒腰子及所有的油,就是倚近腰雙旁的油,及肝裡的網紗及腰子,一概提起來。
3:11 祭司著燒伊佇壇頂,是獻互耶和華做火祭的食物。
3:12 「伊的禮物若是山羊,著佇耶和華的面前獻。
3:13 著按手佇伊的頭殼,刣伊佇會幕前。亞倫的子孫著將血灑佇壇的周圍,
3:14 伊著對這獻伊的禮物做火祭互耶和華,
3:15 用蓋臟腑的油及臟腑所有的油,以及二粒腰子及所有的油,就是倚近腰雙旁的油,及肝頂的網紗及腰子,一概提起來。
3:16 祭司著燒伊佇壇頂,做火祭的食物,取伊的芳芳的。油攏是耶和華的。
3:17 佇恁一切徛起的所在,油及血攏呣通食;這欲做恁逐世代永遠定著的例。」