利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

4:1 耶和華吩咐摩西講:
4:2 「你著吩咐以色列人講:若有人犯罪錯誤犯著耶和華所命令呣通行的一項,
4:3 若受抹油的祭司犯罪,連累百姓佇罪,就著因為伊所犯的罪,用無瑕疵的牛牨(káng)仔獻互耶和華做贖罪祭。
4:4 伊著牽牛牨仔到會幕門口,佇耶和華的面前,按手佇牛牨(káng)仔的頭殼頂,刣牛牨仔佇耶和華的面前。
4:5 受抹油的祭司著取淡薄牛牨的血帶到會幕,
4:6 祭司著用指頭仔搵血,佇耶和華的面前對聖所的帳簾前灑血七擺,
4:7 祭司閣著用淡薄血抹佇會幕內、佇耶和華的面前香壇許個角,伊也著用牛牨仔的血攏傾佇會幕門口、燒祭的壇腳。
4:8 伊著用贖罪祭的牛牨仔所有的油攏提起來,用蓋臟腑的油及臟腑所有的油,
4:9 以及二粒腰子及所有的油,就是倚近腰雙旁的油,及肝裡的網紗及腰子,一概提起來,
4:10 及對謝恩祭的牛牨仔所提起來的一樣;祭司著燒許個佇燒祭的壇頂。
4:11 牛牨仔的皮及所有的肉,及伊的頭、伊的腿、伊的臟腑、伊的糞,
4:12 就是全牲隻牛牨仔,著帶出營外到清氣的地、傾火灰的所在,用火燒佇柴頂佇傾火灰的所在燒伊。
4:13 「若是以色列全會行錯行耶和華所命令呣通行的一項事,致到有罪,代誌猶久隱密、會眾看無著的,
4:14 到所犯的罪,人一下知會眾就著獻一隻牛牨仔子做贖罪祭,牽到會幕前。
4:15 會中的長老就著佇耶和華的面前按手佇牛牨仔的頭殼頂,牛牨仔著刣(thâi)佇耶和華的面前。
4:16 受抹油的祭司著取淡薄牛牨仔的血帶到會幕,
4:17 祭司著用指頭仔搵血佇耶和華的面前,佇帳簾的頭前灑七擺,
4:18  閣著用淡薄血抹佇會幕內、佇耶和華的面前的壇許個角,伊也著用所有的血攏傾佇會幕的門口、燒祭的壇腳。
4:19 著將所有的油攏提起來,燒佇壇頂;
4:20 著行佇此隻牛牨仔,親像所行佇贖罪祭的牛牨仔著照按呢行。祭司著按呢替贖罪,就欲得著赦免。
4:21 伊著將牛牨仔帶出營外燒伊,親像燒頭一隻牛牨仔一樣;這是會眾的贖罪祭。
4:22 「官長若有犯罪錯誤行耶和華──伊的上帝所命令呣通行的一項事,致到有罪,
4:23 所犯的罪到伊家己知,就著牽一隻無瑕疵的山羊牨做伊的禮物,
4:24 著按伊的手佇山羊的頭殼頂,刣伊佇耶和華的面前、佇刣燒祭的精牲的所在;這是贖罪祭。
4:25 祭司著用指頭仔提淡薄贖罪祭的血,抹佇燒祭的壇許個角,將血傾佇燒祭的壇腳。
4:26 所有的油,伊攏著燒佇壇頂,親像謝恩祭的油一樣。論到伊的罪,祭司著按呢給伊贖罪,伊就欲得著赦免。
4:27 「百姓中若有人錯誤犯罪行耶和華所命令呣通行的一項事,致到有罪,
4:28  所犯的罪到伊家己知,伊因為所犯的罪就著牽一隻無瑕疵的山羊母做伊的禮物,
4:29 著按伊的手佇贖罪精牲的頭殼頂,佇燒祭的所在刣贖罪祭的精牲。
4:30 祭司著用指頭仔提淡薄羊血,抹佇燒祭的壇許個角,所有的血攏著傾佇壇腳裡,
4:31 著將伊所有的油攏提起來,親像提謝恩祭的油一樣。祭司著燒伊佇壇頂,佇耶和華的面前做芳味,祭司著為伊贖罪,伊就欲得著赦免。
4:32 「伊若牽一隻綿羊仔做贖罪祭的禮物,就著牽一隻無瑕疵的羊母(iûⁿ-bú),
4:33 著按伊的手佇贖罪精牲的頭殼頂,佇刣燒祭的所在刣贖罪祭的精牲。
4:34 祭司著用指頭仔提淡薄贖罪祭精牲的血,抹佇燒祭的壇許個角,所有的血攏著傾佇壇腳裡,
4:35 著將伊所有的油攏提起來,親像謝恩祭提去羊仔的油一樣。祭司著燒伊佇壇頂,親像獻互耶和華的火祭。論到伊所犯著的罪,祭司著按呢給伊贖罪,伊就欲得著赦免。」

回聖經目錄