路 加 福 音

1 2 3 4 5 6 7 8 9 10 11 12 13 14 15 16 17 18 19 20 21 22 23 24

15:1 眾抽餉的及歹人啲就近耶穌來聽伊。
15:2 法利賽人及經學士耦耦唸講:「此個人接納歹人,續及食。」
15:3 耶穌設此個譬喻對講:
15:4 「恁中間甚麼人有一百隻羊失落一隻,豈無且(chhiáⁿ)放九十九隻佇山裡,去尋所失落的,到得著嗎?
15:5 已經尋著,就歡喜背(pē)伊佇肩頭頂,
15:6 到厝,就聚集伊的朋友厝邊,給講:『著及我歡喜,因為所失落的羊我已經尋著。』
15:7 我給恁講,歹人中有一人反悔,就佇天裡也欲按呢為著伊歡喜,比為著九十九個義人呣免反悔的閣卡歡喜。」
15:8 「抑(á)是甚麼婦仁人有十個銀仔,若失落一個,豈無點燈,掃厝,勤勤(khûn-khûn)尋到著嗎?
15:9 已經尋著,就聚集伊的朋友厝邊,講:『著及我歡喜,因為所失落的銀仔我已經尋著!』
15:10 我給恁講,歹人中有一人反悔,就佇上帝天使的面前為著伊喜歡也是按呢。」
15:11 閣講:「某人有二個子。
15:12 彼個第二個給老父講:『阿爸啊,將我應得的業分互我。』伊的老父就給in分家伙。
15:13 閣無幾日,彼個第二子一盡收拾伊的物,出外去遠遠的所在。佇遐放蕩,毀壞伊的業。
15:14 已經損(sńg)了了,抵著彼所在大飢荒,伊才知欠缺的艱苦。
15:15 就去倚彼所在一個百姓;彼人差伊去山裡飼豬。
15:16 愛將豬所食的豆莢(tāu-koeh)來止飢,也無人互伊。
15:17 伊醒悟,就講:『我的老父有偌多長工,米糧食有剩,若是我佇遮啲欲餓死啊!
15:18 我欲起來,去尋我的老父,給伊講:阿爸啊!我有得罪天,及佇你的面前;
15:19 今了後,我堪得叫做你的子,著互我親像你的長工的一個。』
15:20 就起來,去尋伊的老父。相離猶久遠,伊的老父看見伊,就憐憫伊,走去抱伊的頷頸,直直給伊唚。
15:21 子就給伊講:『阿爸啊!我有得罪天,及佇你的面前;今了後,堪得叫做你的子。』
15:22 若是老父對伊許個奴僕講:『緊緊擜(hiahⁿ)上好的衫來給伊穿;閣給伊掛手指;續給伊穿鞋;
15:23 也牽彼隻肥的牛仔來刣,咱食來歡喜;
15:24 因為我此個子死有復活,失落有閣得著。』就相及歡喜。
15:25 彼時,伊的大子佇園裡。倒來欲到厝,聽見作樂(chok-ga̍k)及跳舞的聲,
15:26 就叫一個奴僕來,問伊啲啥代。
15:27 伊給伊講:『恁小弟來啦;恁老父因為得著伊好好倒來,所以刣彼隻肥的牛仔。』
15:28 大子受氣,呣入去;伊的老父出來勸伊。
15:29 伊應伊的老父講:『你看,我服事你許多年,攏未曾違逆你的命令,你也未曾互我一隻羊仔子,通及我的朋友相及喜歡。
15:30 總是你此個子,交陪娼妓一盡破費你的業,一下倒來,你就為著伊刣肥的牛仔。』
15:31 老父就給伊講:『子啊!你常常及我佇啲,凡我所有的攏是你的;
15:32 若是你此個小弟死有復活,失落有閣得著,咱應該著歡喜快樂。』」