彌 迦 書

1 2 3 4 5 6 7

1:1 耶和華的話臨到摩利沙人彌迦,就是佇猶大約坦亞哈斯希西家的時,所看見論到撒瑪利亞耶路撒冷的事。
1:2 諸個百姓啊,恁攏著聽!地及其中所有的,亦著俯耳孔!主耶和華就是對伊的聖殿出來的主欲干證恁的呣著。
1:3 看啊,耶和華對伊的所在出來,伊欲降臨踏佇地高的所在。
1:4 眾山佇伊的下面消溶,眾山谷離開,親像蠟倚近火,親像水流落山坪。
1:5 這攏是因為雅各的罪過,以色列家的罪惡,雅各的罪過是甚麼?豈呣是撒瑪利亞嗎?猶大的山頭壇是甚麼?豈呣是耶路撒冷嗎?
1:6 所以我欲互撒瑪利亞變做田裡的土堆,閣做種葡萄的所在;亦欲將伊的石頭傾落山谷中,來露出伊的地基。
1:7 伊一切雕刻的偶像欲受拍碎;伊所得著人送的財物,欲互火燒去;所有的佛,我欲互伊荒廢;因為伊用娼妓的工錢來積聚,後來欲歸佇娼妓做工錢。
1:8 因為按呢,我欲大聲啼哭,赤身露體來行;閣欲喉叫親像山狗,哀傷親像駝鳥。
1:9 因為伊的傷醫得,此個事已經近猶大的所在,到我的百姓的城門就是耶路撒冷
1:10 莫得報告佇迦得,攏莫得啼哭;我佇伯亞弗拉翱(kō)佇塵埃的中間。
1:11 沙斐徛起的百姓啊,恁著褪裼見誚過去。撒南徛起的百姓無出來。伯以設人啼哭,互恁無所在通歇腳。
1:12 瑪律徛起的百姓苦心欣慕福氣,因為災禍對耶和華遐到耶路撒冷的城門。
1:13 拉吉徛起的百姓啊,著用車套(gáu)走的馬;伊做錫安的百姓犯罪的起頭;以色列的罪過佇你遐發現。
1:14 所以你著用禮物給摩利設迦特送行。亞革悉諸個家欲用詭計款待以色列諸個王。
1:15 瑪利沙徛起的百姓啊,我欲互承受你的業的到你遐;以色列的榮光欲到亞杜蘭
1:16 你著為你所歡喜的子,剃你的頭毛,互伊光裸裸,無剩半支,親像臭頭的鷹鳥,因為攏受掠離開你。