腓 利 門 書

1

1:1 做基督耶穌的囚犯 ( siû-hoãn) 保羅,及兄弟提摩太批寄互阮所疼同著磨的腓利門
1:2 及姊妹亞腓亞以及及我同當兵的亞基布,及聚集佇你的家的教會。
1:3 願恁對咱的父上帝及主耶穌基督得著恩典、平安!
1:4 我常常感謝我的上帝,佇我祈禱的中間數念你;
1:5 因為聽見你的仁愛及你所有的信,就是向主耶穌及顯出佇眾聖徒的。
1:6 願你的信的相通有功效,通深知恁中間萬項的好來歸佇基督。
1:7 兄弟啊,我為著你的仁愛,大歡喜,大安慰,因為聖徒的心對你得著安息。
1:8 所以我雖然佇基督有通好膽將所合宜行的吩咐你,
1:9 獨獨因為相疼的緣故寧可求你,我就是年老的保羅,現今也為著基督耶穌來受關監,
1:10 我為著我的子,就是我佇掛鐵鍊的時所生的阿尼西謀來求你。
1:11 伊前無利益你,現今就做你我的利益。
1:12 我有差伊閣倒去你遐;此人就是我的心腹。
1:13 我本愛留伊及我住,通佇我為著福音掛鐵鍊的時替你服事我。
1:14 總是未知你的意思,我就呣愛做甚麼,是欲互你的好呣是出佇勉強,是出佇甘願。
1:15 因為伊暫時離開你,豈採是欲互你通永遠得著伊,
1:16 呣是猶原做奴僕,是贏過奴僕,就是做所疼的兄弟。我實在看伊做按呢,何況伊是你家內的人!閣是屬佇主的,豈無閣卡疼伊嗎?
1:17 所以你若掠我做同伴,著接納伊,親像接納我。
1:18  伊若有剋虧你,抑是欠你甚麼,通算我的數;
1:19 保羅親手寫,我欲坐額。免我給你講,你所欠我的是你本身的生命。
1:20 是啦,兄弟啊,互我佇主對你得著歡喜,互我的心佇基督得著安息。
1:21 我已經深信你的順趁,就寫批互你,因為知你所欲行的會過頭佇我所講的。
1:22 閣也著備辦所在互我住;因為我向望對恁的祈禱,上帝欲將我賞賜恁。
1:23 以巴弗就是佇基督耶穌及我做同關監的請安你。
1:24 及我相及著磨的馬可亞里達古底馬路加也請安你。
1:25 願咱的主耶穌基督的恩典及恁的神相及佇啲。阿門!