民 數 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

15:1 耶和華吩咐摩西講:
15:2 「你著吩咐以色列人,給講:恁若到我所賞賜恁徛起的地,
15:3 若愛對牛群抑羊群獻互耶和華,做火祭,就是燒祭,抑是別號的祭,欲謝願,抑是做歡喜獻的祭,抑是到定著的節期,做芳芳獻互耶和華。
15:4 彼個獻禮物的逐隻羊仔著配幼的麵粉伊法十份一,及油一欣四份一,調和做素祭。
15:5 酒也著一欣四份的一,來做灌奠,無論燒祭,抑是別物祭,攏著按呢來獻互耶和華。
15:6 為著綿羊牨(káng)你著備辦幼的麵粉伊法十份二,及油一欣三份一,調和做素祭,
15:7 閣用酒一欣三份一做灌奠祭,做芳芳來獻互耶和華。
15:8  你若備辦牛牨仔做燒祭,抑是別號的祭來謝願,抑是做謝恩祭,來獻互耶和華,
15:9 就是用幼的麵粉伊法十份三,及油半欣,調和做素祭,及牛牨相及獻,
15:10 閣用酒半欣做灌奠的祭,獻互耶和華做芳芳的火祭。
15:11 「或是為著一隻牛牨,抑是一隻綿羊牨,抑是一隻綿羊仔,抑是山羊仔,攏著按呢做。
15:12 照恁所備辦的數額,照逐隻的額數攏著按呢做。
15:13 見若本地人將芳芳的火祭獻互耶和華,攏著按呢做諸個代誌。
15:14

若有外面人出外佇恁中間,抑是逐世代有人徛起佇恁中間,欲獻火祭芳芳佇耶和華,恁按呢行,也著按呢行。

15:15 論會眾,恁及徛起佇恁中間的出外人攏同一樣的例,做恁逐世代永遠的例,佇耶和華的面前,恁按呢,出外人也著按呢。
15:16 恁及外面人出外佇恁中間的著同一樣的例,一樣的法度。」
15:17 耶和華吩咐摩西講:
15:18 「你著吩咐以色列人給講:恁到我所導恁入去彼個地,
15:19 食彼所在的米糧,就著獻舉祭互耶和華。
15:20 恁著用起頭熟的麥粉創餅,獻做舉祭;恁舉起,親像舉起五穀場的五穀一樣。
15:21 恁逐世代著用恁起頭熟的麥粉,做舉祭獻互耶和華。
15:22 「恁有錯誤的時,無守耶和華所吩咐摩西諸個一切的命令,
15:23 就是耶和華託摩西一切所命令恁的,對耶和華命令恁的日到佇恁的逐世代,
15:24 若有錯誤行,會眾也呣知,後來會眾著獻一隻牛牨仔做燒祭,也照法度用伊的素祭及灌奠的祭,相及做芳芳獻互耶和華,閣著獻一隻山羊牨做贖罪的祭。
15:25 祭司著為以色列人的會眾贖罪,就得著赦免,因為這是錯誤。也因為的錯誤,帶的禮物,就是獻互耶和華的火祭及贖罪祭,攏帶到耶和華的面前。
15:26 以色列人的會眾及寄腳佇中間的外人就欲得著赦免,因為此個罪是百姓錯誤犯的。
15:27 「若有一人錯誤犯罪,伊就著獻未滿年的山羊母做贖罪祭。
15:28 彼個錯誤行的人佇伊錯誤犯罪的時,祭司著佇耶和華的面前給伊贖罪給伊贖罪,伊就欲得著赦免。
15:29 以色列中的本地人及寄腳佇中間的出外人,若錯誤行甚麼事,著同一個例。
15:30 總是彼個自專行代誌的,無論是本地人抑是寄腳的,伊褻瀆耶和華,著對伊的百姓中剪除去。
15:31 因為伊藐視耶和華的話,悖逆伊的命令,彼人著一盡剪除;伊的罪過欲歸佇伊。」
15:32 以色列人佇曠野的時,抵著一人佇安息日拾柴。
15:33 許個抵著彼個拾柴的人,帶伊到摩西亞倫及會眾遐,
15:34 就給伊關禁;因為猶未指明,著怎樣辦伊。
15:35 耶和華對摩西講:「彼人的確著互伊死;會眾著佇營外用石頭擲伊。」
15:36 會眾導彼人出營外,用石頭擲伊到死,是照耶和華所命令摩西的。
15:37 耶和華吩咐摩西講:
15:38

「你著吩咐以色列人給講,互代代佇衫仔墘做鬚,閣佇下底邊的鬚頂糽一條藍色的幼帶。

15:39 欲給恁做鬚,互恁看見通記得耶和華的命令來行伊,免得恁放縱家己的心意、家己的目睭來行淫行,親像恁平素所行的一樣;
15:40 互恁記得來行我一切的命令,成做聖,歸恁的上帝。
15:41 「我是耶和華──恁的上帝,導恁出埃及地,欲做恁的上帝。我是耶和華──恁的上帝。」