民 數 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

6:1  耶和華吩咐摩西講:
6:2 「你著吩咐以色列人給講:無論男女下特別的願,就是拿細耳人的願,家己分別歸互耶和華。
6:3 伊就著離開酒及厚酒,也呣通飲甚麼酒的醋及厚酒的醋;呣通飲甚麼葡萄的汁,也呣通食青的葡萄及乾的葡萄。
6:4 佇一切家己分別的日,見若葡萄樹所出的,對核到皮,攏呣通食。
6:5 「佇伊下願家己分別許個日,呣通互剃頭刀到伊的頭殼,到伊家己分別歸互耶和華的日滿,伊著做聖,出在伊的頭毛發長。
6:6 佇伊家己分別歸耶和華許個日,呣通倚近身屍。
6:7 伊的老父抑是老母抑是兄弟抑是姊妹死的時,伊呣通為著互家己無清氣,因為伊家己分別歸上帝的憑據是佇伊的頭殼。
6:8 佇伊家己分別許個日伊是歸佇耶和華做聖。
6:9 「若佇伊的身邊忽然有人死,致到染著伊家己分別的頭殼,就伊著佇家己清氣的日,剃頭,就是佇第七日剃伊。
6:10 第八日,伊著用二隻鳩鵻抑是二隻鴿仔子帶到會幕門口,交代祭司。
6:11 祭司著獻一隻做贖罪祭,一隻做燒祭,給伊贖罪因為伊對身屍來有罪,閣著佇彼日互伊的頭殼做聖。
6:12 伊著閣用伊分別的日分別來歸耶和華,閣著牽一隻未滿年的羊牨(káng)仔做補過失的祭;總是以前的日無算數,因為伊的家己分別已經受染垃墋。
6:13 拿細耳人家己分別的日已經滿彼個例就是按呢:人著導伊到會幕的門口,
6:14 伊著將伊的禮物獻互耶和華,就是一隻無瑕疵、未滿年的綿羊牨(káng)仔做燒祭,一隻無瑕疵、未滿年的綿羊母仔做贖罪祭,及一隻無瑕疵的綿羊牨做謝恩的祭,
6:15 閣一筐的無酵餅就是調和油幼麵粉做的餅,及抹油無酵的薄餅,以及伊的素祭及灌奠的祭。
6:16 祭司著提諸個到耶和華的面前來獻彼人的贖罪祭及燒祭;
6:17 伊也著將彼隻羊牨(káng)及彼筐無酵餅獻互耶和華做謝恩的祭,祭司也著續獻伊的素祭及灌奠。
6:18 拿細耳人著佇會幕門口剃家己分別的頭,將家己分別的頭毛下佇謝恩祭下面的火頂。
6:19 拿細耳人剃伊家己分別的頭毛了後,祭司就著取已經煮的羊牨一支前腿,閣對筐仔內提一個無酵餅及一個無酵的薄餅,攏下佇伊的手。
6:20 祭司著提諸個做搖祭,搖佇耶和華的面前;這及所搖的胸、所舉的腿攏做聖物,歸互祭司。然後拿細耳人通飲酒。
6:21 「下願的拿細耳人為著伊分別家己所獻的禮物,及伊以外所會得著的,獻互耶和華,就是此個例。伊按呢下願就著照分別家己的例來行。」
6:22 耶和華吩咐摩西講:
6:23 「你著吩咐亞倫及伊的子講:恁著按呢給以色列人祝福,對in講:
6:24 『願耶和華賜福你,保護你。
6:25 願耶和華互伊的面的光照你,施恩互你。
6:26 願耶和華歡喜的面看你,賞賜你平安。』
6:27 按呢欲用我的名下佇以色列人的頂面;我也欲賜福。」

回聖經目錄