俄 巴 底 亞 書

1

1:1 俄巴底亞所得著的默示。主耶和華論到以東講:阮對耶和華遐聽見消息,也有使者奉差去列國,講:起來啊,咱著起來及伊交戰!
1:2 看啊,我互你佇列國中做微細,互人大大看輕。
1:3

佇石洞內、徛起高的所在的啊,你的心的驕傲騙你,心內講:是誰會給我降落地啊?

1:4 你雖然升高親像鷹鳥,作巢佇星的中間,我欲對遐給你降落。這是耶和華講的。
1:5

賊若來你遐,抑是強盜暝時來──豈呣是偷到滿意若定──挽葡萄者若來到你遐挽,豈無猶留幾粒仔嗎?你抵著剪除到怎樣啊?

1:6 以掃怎樣受搜尋啊?伊所囥的寶物怎樣受查出啊?以掃怎樣受搜尋啊?伊所囥的寶物怎樣受查出啊?
1:7 及你結約者攏帶你到邊界;及你和好者欺騙你,卡贏你;食你的米糧者設活罩佇你的下面;伊的心攏無智識。
1:8 耶和華講:到彼日,我豈無對以東除滅智慧的人?對以掃的山除滅聰明的人?
1:9 提幔啊,你的勇士欲驚惶,致到踮以掃的山逐人受刣死剪除。
1:10 因為你暴虐你的兄弟雅各,你欲抵著大大見誚,你亦欲永遠受剪除。
1:11

當你徛佇邊頭的日,外人搶伊的財物,異邦人入伊的城門,為耶路撒冷拈鬮(liam-khau),彼日你親像中間的一個。

1:12 當你的兄弟的日,就是伊抵著患難的日,你呣應該徛啲看;猶大人受滅的日,你呣應該為著按呢來歡喜;抵著災難的日,你呣應該講大話。
1:13 我的百姓抵著災禍的日,你呣應該入伊的門;抵著災禍的日,你呣應該看啲受苦;抵著災禍的日,你呣應該摸著的財物;
1:14 你呣應該徛佇雙叉路,截(cha̍h)中間逃走的人;抵著災難的日,你呣應該將剩的人交付對敵。
1:15 因為耶和華辦理萬國的日近啦。照你所行的,也欲按呢行佇你;你所做的欲歸佇你的頭殼。
1:16 因為親像恁佇我的聖山曾飲,萬國也欲親像按呢長長飲;亦飲也吞落去,就欲歸佇無。
1:17 錫安山欲有逃脫的人,亦欲成做聖;雅各家欲得著伊本有的業。
1:18 雅各家欲成做火;約瑟家欲成做火焰;以掃的家欲做稻稿;火欲燒來滅伊。以掃的家欲無留一個。因為耶和華有講伊。
1:19 南方的人欲得著以掃的山;平洋的人欲得著非利士,亦欲得著以法蓮的田及撒瑪利亞的田;便雅憫人欲得著基列
1:20 以色列軍隊諸個受掠者欲得著屬迦南人的地,直到撒勒法;踮佇西法拉受掠的耶路撒冷人欲得著南方的城。
1:21 欲有諸個拯救者上錫安山,來審判以掃的山;國度就歸耶和華。