腓 利 比 書

1 2 3 4

2:1 所以,若佇基督有甚麼勸勉,抑是甚麼仁愛的安慰,抑是有聖神的甚麼交通,抑是有甚麼慈悲憐憫,
2:2 恁著互我的歡喜充滿,就是同心志,同仁愛,心神和合,心志專一。
2:3 凡事莫得為著結黨,抑是為著空空的榮光來做;獨獨大家用謙遜的心,看別人卡贏佇本身。
2:4 恁逐人莫得顧家己的事,也著顧別人的事。
2:5 恁著有基督耶穌的心做心:
2:6 伊本有上帝的形狀,無掠及上帝平等做所著執守的;
2:7 反轉傾(piàⁿ)空家己,取奴僕的形狀,成做人的樣相(iūⁿ-siùⁿ);
2:8 已經有親像人的款式,就屈(khut)家己,順服到佇死,甚至死佇十字架。
2:9 所以,上帝高升伊極高,賞賜伊彼個名(pôa)過佇萬名的頂面的,
2:10 互見若佇天、佇地,及佇地下的,佇耶穌的名無一個腳頭窩呣跪拜,
2:11 無一個嘴呣稱呼「耶穌基督做主」,來歸榮光父上帝。
2:12 所以,我所疼的兄弟啊,親像恁曾常常順趁,呣若佇我及恁佇啲的時,就現今我無及恁佇啲,益發著用驚惶愕愕惙來做成恁家己的得救。
2:13 因為恁有彼個意願,有彼個所行,攏是對上帝為著伊的好意來行佇恁心內。
2:14 恁凡事莫得耦耦(ngauh-ngauh)唸,莫得爭辯,
2:15 才互恁無通嫌,真實無假,做上帝的子兒無瑕疵佇邪僻橫逆(siâ-phiah- hêng-ge̍k)的世界。恁佇中間出現,親像照光佇世間的,
2:16 顯明活命的道理,互我到佇基督的日有通誇口,因為我呣是空空跑走,也呣是空空著磨。
2:17 就若用恁的信做祭物來服事,我做灌奠(kòan-tiān)佇彼頂面,我是歡喜,也及恁眾人相及歡喜。
2:18 恁也著按呢歡喜,續及我相及歡喜。
2:19 若是我佇主耶穌向望緊緊差提摩太去就近恁,互我知恁的事,來安我的心。
2:20 因為我無別個同心的人,真正掛慮恁的代誌的。
2:21 因為眾人攏是圖謀家己的事,呣是圖謀耶穌基督的事。
2:22 若是提摩太的經驗恁知;就是及我相及著磨,來興起福音,親像子對老父按呢。
2:23 所以,我看我的代誌怎樣,向望連鞭差伊去;
2:24 總是我佇主深信本身也欲緊緊到。
2:25 若是我想要緊著差以巴弗提就近恁。伊就是我的兄弟,同做工的,同當兵的,也是恁的使者,供給我所欠用的。
2:26 因為伊戀慕(loân-bō.)恁眾人,來慘慼(chhám-oeh),是恁曾聽見伊破病。
2:27 伊果然有破病,到險險死;若是上帝憐憫伊,呣若憐憫伊,也憐憫我,免得我佇憂悶中加添憂悶。
2:28 所以我閣卡致意差伊,互恁閣看見伊,來歡喜,我就卡無憂悶。
2:29 所以,恁佇主著歡歡喜喜接納伊,也著尊重親像此號的人;
2:30 因為伊為著做基督的工,險險死,家己拼命,欲補恁服事我所無夠的。

回聖經目錄