詩 篇

47:1	〔可拉後裔的詩，交互樂官。〕恁眾百姓啊，恁攏著搭手！著用得勝的聲大聲謳咾上帝！
47:2	因為耶和華至高者，通驚者；伊是大君王管理全地。
47:3	伊欲互萬百姓降服佇阮的下面，亦欲互列邦佇阮的腳下。
47:4	伊給阮揀阮的產業，就是伊所疼的雅各的榮光。（細拉）
47:5	上帝上去，有喝的聲隨伊；耶和華上去，有號頭的聲隨伊。
47:6	恁著唱歌謳咾上帝，著唱歌謳咾！唱歌謳咾咱的王，著唱歌謳咾！
47:7	因為上帝是全地的王；著用智慧唱歌謳咾伊。
47:8	上帝做王治理萬國；上帝坐佇伊聖的寶座。
47:9	列邦的貴族聚集欲做亞伯拉罕的上帝的百姓。因為世界的盾牌是屬佇上帝；伊是極高！