啟 示 錄

1 2 3 4 5 6 7 8 9 10 11 12 13 14 15 16 17 18 19 20 21 22

10:1 我閣看見別個大氣力的天使對天降落,穿雲做衫,頭殼頂有虹,伊的面親像日頭,腳親像火柱。
10:2 手中有細細卷的冊,已經掀開的。伊正腳踏佇海裡,倒腳踏佇地裡,
10:3 大聲喉叫,親像獅啲哮。伊喉叫的時,彼七個雷就出的聲。
10:4 七個雷已經出聲,我欲寫伊,獨獨聽見對天有聲講:「七個雷所講的,你著封密,莫得寫伊。」
10:5 我所看見徛佇海及地裡的天使,抬起伊的正手向天,
10:6 指創造天及天裡的物,地及地裡的物,海及海裡的物,活到代代無窮盡的,來咒誓講:「以後無閣有時日。」
10:7 獨獨佇第七個天使出聲的日,當伊欲歕號頭的時,上帝的奧妙就成,照伊所傳互伊的奴僕許個先知的福音。
10:8 我前所聽見對天的聲,今閣聽見伊對我講話,講:「彼個徛佇海及地裡的天使,手中所提掀開的冊,你著去提伊。」
10:9 我隨時去就近彼個天使,給伊講:「著用彼卷細細的冊互我。」伊就給我講:「你提去食伊,伊欲互你的腹肚苦,佇你的嘴內欲甜親像蜜。」
10:10 我就對彼個天使的手提細卷冊來食伊,佇我嘴內果然甜親像蜜,已經吞落去,我的腹肚就苦。
10:11 給我講:「你著閣讖語來論起多多百姓,多多邦國,多多腔口,多多君王的事。」

回聖經目錄