啟 示 錄

1 2 3 4 5 6 7 8 9 10 11 12 13 14 15 16 17 18 19 20 21 22

4:1 諸個代誌以後,我看見,佇天裡有門開。閣有我起頭所聽見的聲,親像號頭及我講話的,講:「你上來遮,我欲將後來所的確成的事指示你。」
4:2 我隨時受神的感動,忽然看見有座位設佇天裡,座位頂有啲坐的。
4:3 彼個啲坐的,伊的容貌親像碧玉及瑪瑙(bé-ló);伊的座位周圍有虹(khēng),看了親像璁璜(chhong-hêng)玉。
4:4 座位的周圍有二十四個座位;坐佇彼頂面的有二十四個長老,穿白衫,頭殼戴金的冕旒。
4:5 對彼個中央的座位有發出閃爁(sih-nà),及聲,及雷;亦有七支燈火點佇座位前;就是上帝的七個神。
4:6 座位前有親像玻璃的海,彷彿(hóng-hut)親像水晶。座位中及座位的周圍有四個活物,前後有目睭滿滿。
4:7 頭一個活物親像獅,第二個活物親像牛仔,第三個活物有面親像人,第四個活物親像啲飛的鷹。
4:8 四個活物各有六個翅,周圍及內面遍身有目睭。暝日攏無歇睏啲講:聖哉!聖哉!聖哉!主上帝,全能者,早佇啲、現在佇啲、將來亦佇啲的。
4:9 逐擺活物將榮光、尊貴、感謝歸互坐佇座位,活到代代無盡者,
4:10 二十四個長老就仆佇彼個坐佇座位者的面前,敬拜彼個活到代代無盡的,閣將的冕旒佇座位前,講
4:11 阮的主,阮的上帝,你堪得受榮光、尊貴、權能;因為你曾創造萬物,萬物佇啲萬物受創造攏是對你的旨意。

回聖經目錄