啟 示 錄

1 2 3 4 5 6 7 8 9 10 11 12 13 14 15 16 17 18 19 20 21 22

6:1 羊羔開七個印的一個,彼時我啲看,就聽見四個活物的一個,伊的聲親像雷,講:「來啊!」
6:2  我就看,有白馬;騎伊的,有攑 弓,亦有冕旒互伊。伊就出去,得勝閣欲得勝。
6:3 開第二個印的時,我聽見第二個活物講:「來啊!」
6:4 閣有一隻馬出來,是赤的,有權柄互彼個騎馬的,對地上搶奪和平,互人相刣;閣有將大支刀互伊。
6:5 開第三個印的時,我聽見第三個活物講:「來啊!」我就看,有黑馬;騎伊的,手攑秤(chhìn)。
6:6 我聽見四個活物的中間親像有聲講:「麥一升(chin)一個銀仔,大麥三升也一個銀仔;油及酒呣通拍歹。」
6:7 開第四個印的時,我聽見第四個活物的聲講:「來啊!」
6:8 我就看,有火灰(hé-hu)色的馬;騎伊的,伊的名叫做死,陰府隨伊的後面同行;有權柄互,通治理地上的四份一,用刀劍、飢荒、瘟疫,及地上的野獸來滅伊。
6:9 開第五個印的時,我看見祭壇下,有為著上帝的道理,及為著所執守的干證,來受刣的人的靈魂,
6:10 大聲喉叫講:「聖閣真的主宰啊,你無審判佇地上的人,來伸阮流血的冤,欲到甚麼時啊?」
6:11 就有白衫互逐人;閣給講,著請歇淡薄久,聽候同做奴僕的及兄弟,就是欲親像受刣的,數額一盡滿。
6:12 我看伊開第六個印的時,地大振動,日變黑親像毛黑布,月歸個親像血,
6:13 天星墜落地,親像無花果樹互大風所搖,落(lak)未熟的果子一樣。
6:14 天就抵著遷徙,親像軸(chhat)捲起來;山及海嶼攏走差(choa̍h)。
6:15 地上諸個王、大夫、千總、富人、猛人,以及攏總做奴僕的、自由的,家己匿(bih)佇山洞、山巖,
6:16 對山及巖講:「壓啲(teh)佇阮的頂面!遮蓋(jia-khàm)阮,通閃避彼個坐佇座位者的面及羊羔的受氣;
6:17 因為受氣的大日已經到啦,是誰徛會住啊?」

回聖經目錄