路 得 記

1 2 3 4

3:1 伊的乾家拿俄米給伊講:「我的查某子啊,我豈呣著給你尋一個安身的所在,互你享福嗎?
3:2 你及伊的女婢做陣的波阿斯,伊豈呣是咱的該親嗎?看啊,伊今暝(kim-mî)簸(pòa)大麥佇五穀場(gō͘-kak-tiûⁿ);
3:3 你著洗身軀抹油,換衫,落去到五穀場,總是呣通互彼人認著你。聽候伊飲食明白,
3:4 到伊倒啲的時,你著斟酌看伊倒的所在,就入去掀伊的腳所蓋的,倒佇遐,伊欲給你講,你所著行的。」
3:5 伊就講:「你所吩咐的,我攏欲行伊。」
3:6 伊就落去到五穀場,攏照伊的乾家所吩咐的行。
3:7 波阿斯飲食明白,心歡喜,就去倒佇麥堆的邊頭。伊就跕腳(liam-kha)入去掀開伊的腳所蓋的,倒佇遐。
3:8 到半暝,彼人著驚,翻身,無拍算有查某囝仔倒佇伊的腳遐。
3:9 伊就講:「你甚麼人?」應講:「我是你的女婢路得。請你用你的衫仔裾來蓋你的女婢,因為你是我的該親。」
3:10 伊講:「我的查某子啊,願你得著耶和華賜福。你此路尾的恩情比前的卡大;因為少年人無論喪鄉好額,你攏無隨伊。
3:11 我的查某子啊,今你呣免驚,見若你所講的,我欲給你行;因為我本城的百姓攏知你是好德行(tek-hēng)的女子(lú-chú)。
3:12 我實在是你的該親的一個,總是猶有一個比我閣卡親。
3:13 你今暝歇遮,明仔早起伊若肯給你盡該親的本份,就好,互伊盡該親的本份。伊若呣肯給你盡該親的本份,我指永活的耶和華來咒誓,我欲給你盡該親的本份,你通倒遮到天光。」
3:14 伊就倒佇伊的腳下到天光,認得人的時就起來。波阿斯講:「呣通互人知有查某囝仔到五穀場裡」;
3:15 閣講:「你提你所穿的外衫,用手牽伊。」伊就牽伊,彼人就量大麥六下,互伊背(pē)去,伊就入城。
3:16 伊到伊的乾家遐,乾家講:「我的查某子啊,你今怎樣啊?」伊就將彼人對伊所行的攏給伊講,
3:17 閣講:「彼人用諸個大麥六下互我,給我講:『你呣通空手倒去恁乾家遐。』」
3:18 伊就講:「我的查某子啊,你通安心坐啲,聽候知這事怎樣成,因為彼人今仔日無做成此個事的確無息。」


回聖經目錄