撒 迦 利 亞

1 2 3 4 5 6 7 8 9 10 11 12 13 14

4:1 彼個及我講話的使者閣來叫我醒,親像人啲睏受叫醒一樣。
4:2 伊給我講:「你看見甚麼?」我講:「我看見,看啊,有一個燈台,是歸支用金做的,頂面有一個油櫃,燈台頂有七盞燈,頂面的燈盞,有七條管。
4:3 閣有二欉的橄欖樹,一欉佇油櫃的正旁,一欉佇油櫃的倒旁。」
4:4 我問及我講話的使者講:「我的主啊,諸個是甚麼?」
4:5 及我講話的使者應我講:「你呣知諸個是甚麼嗎?」我講:「我的主啊,我呣知。」
4:6 伊應我講:「這是耶和華吩咐所羅巴伯的話。講:呣是用權勢,呣是用能力,就是用我的神。這是萬軍的耶和華講的。
4:7 大山啊,你是甚麼?佇所羅巴伯的面前,你欲成做平地。伊欲互厝角頭的石出來,閣有大歡喜的聲叫講:『恩惠,恩惠歸伊!』」
4:8 耶和華的話閣臨到我講:
4:9 所羅巴伯的手有下此間殿的地基,伊的手亦欲完此個工,你就知萬軍的耶和華差我到恁遮。
4:10 是誰看輕此個小可事的日啊?此七個是耶和華的目睭,往來佇全地,看見所羅巴伯的手提繩線就歡喜。」
4:11 我閣問伊講:「此個燈台左右二欉橄欖樹是甚麼意思?」
4:12 我閣問伊講:「橄欖樹的二枝對二條金的管流出金油是甚麼意思?」
4:13 伊應我講:「你呣知諸個是甚麼意思嗎?」我講:「我的主啊,我呣知。」
4:14 伊講:「這是二個受抹油者徛佇普天下的主的邊仔。」


回聖經目錄