詩 篇

11:1	〔大衛的詩，交互樂官。〕我是倚靠耶和華；恁啥事對我的神魂講：你著親像鳥飛去恁的山。
11:2	看啊，歹人張弓，安的箭佇弓弦，欲暗靜射心內正直的人。
11:3	地基若倒壞，義人猶會做甚麼？
11:4	耶和華佇伊的聖殿；耶和華的寶座佇天裡；伊的目睭啲看，伊的目睭鑑察世間人。
11:5	耶和華試驗義人；獨獨歹人及愛強暴者，伊的心怨恨伊。
11:6	伊欲將羅網拋佇歹人的身上；有火焰、硫磺，及熱熱的風，做杯中的份額。
11:7	因為耶和華是公義，伊歡喜公義；正直的人欲見著伊的面。