詩 篇

68:1	〔大衛的詩歌，交互樂官。〕願上帝起來，互伊的對敵四散，互怨恨伊的人對伊的面前逃走。
68:2	你給趕散，親像煙受吹散；歹人見著上帝的面就消滅，親像蠟見著火就溶去。
68:3	總是義人欲歡喜，佇上帝的面前欲快樂，亦欲歡歡喜喜。
68:4	恁著對上帝吟詩，唱歌謳咾伊的名；為著彼個坐車經過曠野者修造大路。伊的名是耶和華，著佇伊的面前快樂！
68:5	上帝佇伊聖的所在做孤兒的父，做寡婦的伸冤者。
68:6	上帝互孤單的人有家，互受關監的人出來享福；獨獨悖逆的人踮佇乾燥的地。
68:7	上帝啊，早你行佇百姓的頭前，經過曠野。（細拉）
68:8	彼時，地見著上帝的面就振動，天亦落雨；彼個西奈也振動，是見著上帝──以色列的上帝的面。
68:9	上帝啊，你落大雨；你的產業以色列厭倦的時，你互伊堅固。
68:10	你的會眾踮佇彼中間；上帝啊，你為著喪鄉人備辦恩惠。
68:11	主出命令，傳好消息的婦女成大陣。
68:12	管兵的王逃走啦，逃走啦；踮佇家內的婦女分著所搶的物。
68:13	恁倒佇羊內的時，親像鴿的翅鑲白銀，伊的毛鑲黃金。
68:14	全能者佇彼內面趕散列王的時，勢面親像佇撒們山落雪。
68:15	巴珊山是上帝的山；巴珊山是多多山尖的山。
68:16	恁多多山尖的山啊，恁啥事眥上帝所愛徛起的山？耶和華欲踮佇遐到永遠！
68:17	上帝的車千千萬萬；主佇彼中間，親像佇西奈佇聖的所在。
68:18	你已經上到高的所在，掠許個受掠者；你佇人的中間，受所獻的，連悖逆的人亦獻，互耶和華上帝通徛起in中間。
68:19	主是應該謳咾者！伊日日背阮的擔，就是救阮的上帝。（細拉）
68:20	上帝是給阮行逐樣拯救的上帝；會脫離死無是在佇主耶和華。
68:21	總是上帝欲拍破伊的對敵的頭殼，就是彼個常常犯罪的人的頭殼。
68:22	主講：我欲互對巴珊倒轉來，對深淵互倒轉來，
68:23	互你拍碎，你的腳踏佇對敵的血，你的狗的舌舐(chī)。
68:24	上帝啊，你是我的上帝，我的王；人已經看見你啲行，行入聖的所在。
68:25	唱歌者行佇頭前，作樂者隨佇後面，搖鈴瓏鼓的查某囝仔佇中間。
68:26	對以色列的源頭來者，佇逐個會中著謳咾上帝就是主！
68:27	佇遐，有管轄的小便雅憫，有猶大的族長及歸群的眾人，有西布倫的族長，有拿弗他利的族長。
68:28	你的上帝定著你的氣力；上帝啊，求你堅固你給阮所成的事！
68:29	為著你耶路撒冷的殿，列王欲帶禮物獻互你。
68:30	求你責備蘆葦中的野獸及歸群的牛牨，以及列邦中的牛仔。將銀踏佇腳下；上帝趕散愛交戰的百姓。
68:31	大官欲對埃及來；古實欲趕緊向上帝來攑起手。
68:32	世上的列國啊，恁著對上帝唱歌；願恁吟詩謳咾主！
68:33	就是謳咾彼個坐佇對古早就有極高的天的主！伊發出伊的聲，就是極大的聲。
68:34	恁著將權能歸互上帝。伊的威嚴佇以色列的頂面；伊的權能是佇穹蒼。
68:35	上帝啊，你對你聖的所在真正通驚；以色列的上帝是彼個將氣力權能賞賜伊的百姓的。上帝是應該謳咾的！