詩 篇

48:1	〔可拉後裔的詩歌。〕耶和華至大！應該大大得著謳咾，就是佇咱上帝的城，佇伊聖的山。
48:2	錫安山──大君王的城，佇北面高大閣好看，互全地所歡喜。
48:3	上帝佇伊的宮殿內，家己顯明做高台。
48:4	看啊，列王聚集，相及對遮經過。
48:5	看見就卬愕，驚惶緊緊走。
48:6	佇遐愕愕惙，痛疼親像生子的婦仁人。
48:7	你用東風拍破他施的船。
48:8	阮佇萬軍的耶和華的城中──就是阮的上帝的城中──所看見的，抵抵照阮所聽見。上帝欲互此個城堅固到永遠。（細拉）
48:9	上帝啊，阮佇你的殿內數念你的慈愛。
48:10	上帝啊，你所受的謳咾抵抵及你的名相合，到佇地極！你的正手滿滿公義。
48:11	因為你的判斷，錫安山著歡喜，猶大的城著快樂。
48:12	恁著踅錫安，四圍行伊，算伊的城樓。
48:13	詳細看伊的城牆，省察伊的王宮，欲互恁宣傳佇後代。
48:14	因為此個上帝永永遠遠做咱的上帝；伊欲導咱，到佇死的時。