詩 篇

75:1	〔亞薩的詩歌，交互樂官。調是用莫得毀壞的。〕上帝啊，阮感謝你，阮感謝你！因為你的名近近，人報揚你奇妙的所做。
75:2	我到定著的日期，我欲照正直審判。
75:3	地及地上徛起的百姓攏消溶；我斟酌徛在地的柱。（細拉）
75:4	我對驕傲的人講：莫得驕傲！對歹人講：莫得抬起你的角！
75:5	莫得高高抬起你的角；莫得硬你的頷頸來講話。
75:6	因為呣是對東，呣是對西，亦呣是對南來得著舉起。
75:7	只有上帝是判斷者；伊互此個降低，互彼個升高。
75:8	耶和華手裡有杯，其中的酒起沫，杯內有過透的酒滿滿；伊傾出來，地上的歹人欲攏飲此個酒的渣滓，飲到了了。
75:9	獨獨我欲報揚，直到永遠！我欲唱歌謳咾雅各的上帝！
75:10	歹人一切的角，我欲斬斷；義人的角欲得著舉起(kú-khí)。