詩 篇

65:1	〔大衛的詩歌，交互樂官。〕上帝啊，佇錫安有人謳咾啲聽候你；亦欲對你謝所下的願。
65:2	聽人祈禱的主啊，見有血氣的攏欲就近你。
65:3	罪惡卡贏我；論到阮的過失，你攏欲赦免。
65:4	你所揀選、互伊親近你、踮佇你的院內者，此號人有福氣！阮欲因為你的厝、你的聖殿的福氣來心滿意足。
65:5	救阮的上帝啊，你欲用威嚴秉公義來應阮；你是地極及海面遠遠的人攏總所倚靠者。
65:6	伊已經用大權能縖腰，就用伊的氣力安定諸個山。
65:7	諸個海嘩嘩哮及其中海湧嘩嘩哮，以及萬百姓的喧嘩，伊互平靜。
65:8	徛起地極的人因為你的神蹟來驚惶；日出日落的所在你互攏歡喜。
65:9	你眷顧土地，落雨灌沃伊，互伊真肥。上帝的河，伊的水滿滿；你按呢備辦土地，就是替人備辦五穀。
65:10	你灌沃田園滿伊的溝，修平伊的稜，落好的雨水，互土地軟軟；其中所發生的，得著你賜福。
65:11	你用你的恩典做年冬的冕旒；你的路徑(geh)攏有油啲滴。
65:12	滴佇曠野的草埔。山頭用歡喜做帶來縖；
65:13	草埔用羊群做衫來穿；山谷用五穀做(moa)來蓋(khàm)。攏歡喜出聲來吟詩。