詩 篇

56:1	〔非利士人佇迦特掠著大衛。彼時，伊做此個金的詩，交互樂官。調是用「遠遠無聲的鴿」。〕上帝啊，求你可憐我，因為人欲吞食我，通日攻擊壓制我。
56:2	我的對敵通日欲吞食我，因為起驕傲攻擊我的人真多。
56:3	我佇驚惶的時我欲倚靠你。
56:4	我靠上帝，我欲謳咾伊的話；我已經倚靠上帝，我就無驚。屬佇血氣者欲啥法得我奈何？
56:5	通日改斜我的話；對我所想的攏是欲害我。
56:6	聚集，埋伏啲相我的腳步，親像當等欲害我的生命。
56:7	做歹豈會逃脫嗎？上帝啊，求你佇受氣中互眾百姓墮落！
56:8	我的流落，你攏記數；求你將我的目屎收佇你的皮囊。這豈無攏記佇你的冊嗎？
56:9	我求叫的日，我的對敵攏欲越轉身退去。上帝為我，這是我所知。
56:10	我靠上帝，我欲謳咾伊的話；我靠耶和華，我欲謳咾伊的話。
56:11	我已經倚靠上帝，我就無驚。人欲啥法得我奈何(ta-ôa)！
56:12	上帝啊，我對你所下的願佇我的身上；我欲用謝恩的祭獻互你。
56:13	因為你救我的活命脫離死無。你豈呣是保護我的腳無跋倒嗎，互我佇上帝的面前，行佇活命的光中嗎？