詩 篇

148:1	恁著謳咾耶和華！對天頂謳咾耶和華，佇高的所在謳咾伊！
148:2	伊的眾使者啊，恁著謳咾伊！伊的眾天軍啊，恁著謳咾伊！
148:3	日及月啊，恁著謳咾伊！發光的星辰啊，恁攏著謳咾伊！
148:4	天頂的天及天以上的水啊，恁攏著謳咾伊！
148:5	諸個攏著謳咾耶和華的名！因為伊一下命令就攏受創造。
148:6	伊將諸個建立，到永永遠遠；伊有定例，會廢無。
148:7	對地上著謳咾耶和華，就是大魚及一切的深淵，
148:8	火及冰雹，雪及雲霧，趁伊的話的狂風，
148:9	大山及一切的小山，結果子的樹及一切的柏香樹，
148:10	野獸及一切的精牲，蟲及飛鳥，
148:11	世上的君王及萬民，貴族及世上一切的審判官，
148:12	少年人及在室女，老人及囝仔，
148:13	諸個攏著謳咾耶和華的名！因為只有伊的名受尊做高；伊的榮光過天地。
148:14	伊興起伊的百姓的角，互伊聖的百姓攏謳咾伊，就是以色列人，親近主彼個百姓，恁著謳咾耶和華！